Міжнародны Дзень Роднай мовы — 21 лютага

Подробности

Обновлено 15.09.2016

Опубликовано 08.09.2016

Просмотров: 3076

21 лютага ў свеце адзначаецца Міжнародны дзень роднай мовы. Ён быў абвешчаны UNESCO 6 гадоў таму. З ініцыятывай увесці такі дзень выступіў Бангладэш.

21 лютага 1952 года на бяззбройных мірных дэманстрантаў, якія змагаліся за прызнанне бенгальскай мовы ў якасці афіцыяльнай мовы Пакістана, паліцыя адкрыла агонь.Загінула чатыры студэнты.

У 1999 годзе асамблея ААН вызначыла 21 лютага як Міжнародны дзень Роднай мовы.

У гісторыі шмат прыкладаў, калі людзі прысвячалі сваё жыццё, час, грошы, каб адрадзіць сваю мову, спазнаць яе, навучыцца размаўляць на ёй: Эліязэрбэн Ягуда (іўрыт), Францыск Скарына, Ёзэф Юнгманн (чэшскі). А мы часам робім наадварот — губляем жаданне чытаць, размаўляць ці проста слухаць сваю мову
21 лютага — яшчэ адна нагода задумацца аб лёсе роднай мовы і беларусам.

Родная мова шмат не патрабуе. Але калі ўжо назваў яе роднай, калі лічыш яе такой для сябе — павінен жа быць перад ёй хоць нейкі абавязак. Ці хоць часам пра яе думаць. Калі хоць палова з тых сямідзесяці чатырох працэнтаў, якія пад час апошняга перапісу назвал роднай мовай беларускую, падумае аб яе лёсе — значыць, не ўсё яшчэ страчана. Хоць адзін дзень, калі будзе яе афіцыйнае міжнароднае свята.

Калі ты чуешяе — ці то сучасную літаратурную, ці змешаную «трасянку», або мясцовую дыялектную — знай, што гэта ўсё яна — наша беларуская мова. Не адварочвайся, а прымі яе, бо яе месца ў тваёй краіне. І не падчарка яна тут, а паказвае на спрадвечнасць беларусаў на сваёй зямлі. Нашы бацькі, дзяды і прадзеды нямала зрабілі, каб беларуская мова была прызнаная як роўная сярод іншых моў свету.

Будзь і ты разам з тымі, хто думае пра яе будучыню. Размаўляй па-беларуску, бо заўтра наша мова табе, тваім дзецям і ўнукам стане неабходнай. Размаўляй па-нашаму, каб людзі бачылі тваю вернасць сваёй мове. Размаўляй з прыветнай усмешкай, з пяшчотай на вуснах — і тваёй мовай захочуць гаварыць іншыя. І не саромся недасканалай гаворкі. Мова — жывая тканка, прырастае там, дзе крынічыць людское жаданне. Ведай: учора ты яшчэ не гаварыў па-беларуску, сёння размаўляеш на «трасянцы», а заўтра будзеш гаварыць на чыстай літаратурнай мове.

Давайце РАЗАМ БУДЗЕМ РАЗМАЎЛЯЦЬ 21 ЛЮТАГА НА РОДНАЙ МОВЕ!!!
НЯХАЙ ГЭТА СВЯТА БУДЗЕ САПРАЎДНЫМ СВЯТАМ НАШАЙ МОВЫ!

• Вперёд >